Владите на Албанија и на Македонија во Поградец ќе одржат заедничка седница на која што албанската страна ќе побара од Македонија да го продолжи патот „Арбери“, најави премиерот Еди Рама.
Патот „Арбери“ ќе биде долг 72 километри, а неговата изградба официјално ќе започне следната година. Предвидено е да чини 33,6 милијарди и за околу 100 километри да го скрати растојанието од Тирана до Дебар.
– На состанокот со македонскиот премиер во октомври, беше договорено да се одржи заедничка владина седница во Поградец на која ќе одлучиме дека е неопходно и македонската страна да го заврши патот „Арбери“ од другата страна. Ќе го приближиме Дебар со Тирана. Тоа е многу пократок пат кој ќе реши голем проблем, рече албанскиот премиер.
Со патот „Арбери“ ќе се создаде економски коридор со Македонија, потенцира Рама и ќе го направи пристаништето во Драч подостапно.
