„Скопје 2014“ досега чини 207.872.492 евра

Од:

Проектот Скопје 2014 од 2008 до сега чини 207.872.492 евра. Попладнево во детали на скоро два и полчасовна прес-конференција беа презентирани спецификации и ставки за сите трошоци за објекти, скулптури и спомен-обележја за кои се надлежни Министерството за култура, Општина Центар и Службата за општи и заеднички работи на Владата на РМ (СОЗР).

dobivaj vesti na viber

Трите институции имаа цел преку отчетот да ги спречат шпекулациите со кои, како што рече министерката за култура Елизабета Канческа-Милевска, се дефокусирала јавноста иако за сите проекти договорите биле транспарентно објавени од Бирото за јавни набавки.

Тоа што износот го надминал оној од првичната презентација на Скопје 2014 пред пет години, околу 80 милиони евра, Канческа-Милевска рече дека е затоа што многу од градбите ги нема во првиот план, вклучувајќи ги и спомениците во други општини на главниот град.

– Оваа собрана сума сега од 207.872.492 евра е надоградување, проширување на првичната визуелизација, но не се 500 милиони или една милијарда евра, како што се слуша во средствата за јавно информирање. Тие шпекулации воопшто не држат и не се релевантни и вистинити и затоа се кажуваме прецизно, со склучени договори, рече Канческа-Милевска. Појасни дека на основните договори се додавани анекси за дополнителни зафати што биле потребни во тек на реализацијата, но, согласно законската процедура, анексите не надминуваат 30 отсто од основниот договор.

За 33 скулптури  Министерството за култура инвестирало вкупно 885.882 евра. Покрај нив се и скулптурата „Три врби“ во износ од 270.188 евра и „Порта Македонија“ во износ од 5.192.364 евра. Објекти во негова надлежност се: Музејот Македонска борба за кој се исплатени 13.346.969 евра, Стар скопски театар, кој се уште не е завршен и конечната сума ќе биде 36.846.520 евра, Филхармонијата 7.410.130 евра, но се уште тече тендерот за ентериерот и не се знае колку ќе чини договорот, а ентериер и музејска поставка на Археолошкиот музеј чинат 8.174.496 евра.

Досегашниот градоначалник на Центар Владимир Тодоровиќ, кој во оваа пригода им ги честиташе на граѓаните изборите, нагласи дека му било гордост што учествувал во изградбата на Скопје и на центарот на градот. Тој ги презентираше трошоците за спомен-обележјата во Центар, во кои влегуваат и авторски хонорари, трошоци за одржување. Нивната вкупна вредност е 55.418.177 евра и, како што рече Тодоровиќ, се 0,5 отсто од буџетот на државата од сите години на Скопје 2014. Некои споменици се во завршна фаза и нивното поставување се очекува наскоро.

– Со ова е 18 отсто вратен Данок на додадена вредност. Тоа е грубо 40 милиони евра, кои пак се вратени во државата, рече Тодоровиќ. Во врска со најавата на Андреј Жерновски дека ќе прави ревизија на Скопје 2014, рече дека е тоа негово лично право и дека треба да ја направи.

Канческа-Милевска се надоврза: – Ние не се плашиме од никаква ревизија и како Министерство за култура сами побаравме од Државниот завод за ревизија. Сетоа ова што транспарентно го даваме пред јавноста е спроведено од надлежните институции во Министерството, рече Канческа-Милевска. Во одговор на прашањето за стилот на целиот проект, таа рече дека е тоа дискутабило, особено кога немало со што да се спореди во изминатиот период. Додаде дека сите се избрани на меѓународни конкурси за идејно решение.

– Скопје 2014 е потреба и неопходност, со што се облагороди просторот во центарот на главниот град, кој доби нова архитектонско-урбанистичка естетика. По речиси 50 години центарот се помрдна од мртва точка и му се враќа автентичноста, додаде Канческа-Милевска. Спомна и други бенефиции од проектот, како работни места за градежниците, зголемен број туристи (за 54 отсто од 2010 до 2012)…

Министерката нагласи дека со Скопје 2014 не се спречени инвестициите во другите сектори. По години, одвојувањата од државниот буџет за овој проект се: во 2008 е 0,5 отсто, во 2009 е  0,76 отсто, во 2010 е  1,1 отсто, во 2011 е 2,2 отсто, во 2012 е 1,6 отсто и во 2013 е 1,5 отсто од буџетот.

Директорот на СОЗР на Владата на РМ Васе Доневски информираше и за трите  објекти што се во нивна надлежност: Зградата на Министерството за надворешни работи 19.251.506 евра, Јавни обвинители и финансова полиција – не е завршен и се очекува да не надминува 14 милиони евра и објектот за Уставен суд, Археолошки музеј и Државен архив на РМ 27.597.681 евра. СОЗР има и други проекти надвор од Скопје 2014, како подземни гаражи на Уставен суд, подземни гаражи МОБ и партерно уредување, ФДУ и јавна администрација и фасада на Влада, за која договорот од 9.290.000 евра е склучен и деновиве ќе почне реконструкцијата.

Би можело да ве интересира

Арсовски: Хипокризија е обвинувањето на Ковачевски за криминални проекти, кога се дружел со тогашните функционери

Арсовски: Ковачевски како премиер го критикува Скопје 2014, а со радости аплаудирал на проектот

Катерина Павлова-Николовска

СДСМ: Нов случај на криминал за Скопје 2014, поврзан со најкриминалната партија ВМРО-ДПМНЕ

Катерина Павлова-Николовска

Наредба за истражна постапка против четири лица за дел од Проектот „Скопје 2014“

А1он

ВИДЕО: Стефан Немања против Александар Велики – ќе го следи ли Белград примерот на Скопје 2014?

Жарко Настоски

Полицијата две години не ја најде опашката на бикот, Музејот на современа уметност ќе прави нова