Одделот за водовод за градска и селска мрежа при Јавното претпријатие „Комуналец” од Кавадарци активно работи на терен на неколку локации. Како што информира раководителот Бојан Атанасов, продолжува реконструкцијата на фекалната, атмосферската и водоводната мрежа на улицата „Брушанска”. Исто така, во тек се работите околу приклучоците за вода во индустриската зона, на „Западен булевар”.
– Истовремено, се работи на приклучокот за вода за зеленилото на потегот кај Силекс зградите, но и на улицата „Ќиро Крстев”, кај кејот на реката Луда Мара. Континуирано тече редењето на коцки на повеќе локации низ градот, особено таму каде што се интервенирало поради дефекти и слично, вели Атанасов, додавајќи дека отпочнува и реконструкција на фекалната канализација на улицата „Ѓоре Брушански”.