Во акција на полицијата во стан во Гостивар откриена е група која уживала дроги. Сопственикот на станот е приведен и задржан во полициска станица Гостивар.
Од СВР Тетово, информираат дека полициски службеници вчера околу пладне извршиле претрес во станот и помошните простории на гостиварецот С.М. (50) лоциран на улица „Никола Парапунов“ во Гостивар.
– Претресот е реализиран со судска наредба, по претходни, оперативни сознанија, дека сопственикот бил инволвиран во недозволена трговија и злоупотреба на опојни дроги. Во спалната на станот пронајдени се вкупно 17 пакувања од најлонски кесечки со непозната прашкаста материја, најверојатно хероин. Тие биле сокриени под перницата и зад телевизорот. Во плакар во ходникот, пак, пронајдени се 7 медицински шприцеви со 12 игли, а во друга соба три пластични шишиња наполнети со вода и затворени со алуминиумска фолија, информираат од СВР Тетово.
Во станот на С.М. за време на претресот се наоѓале уште пет лица: В.С. (28), Н.И (30), К.С (43) од Гостивар, С.Р (23) од Скопје и А.М (24) од Прилеп. Повеќето од лицата од претходно се познати како уживатели на наркотици.
Сопственикот на станот и петте затекнати лица приведени и задржани се во Полициската станица Гостивар, а пронајдените предмети се одземени и дадени на вештачење.
По целосното расветлување на сите поединости поврзани со случајот, најавени се и соодветни поднесоци.