Гостиварската полиција извести дека вчера постигнала нов успех во борбата против нелегалното оружје, поднесувајќи кривична пријава против 82-годишен дедо од селото Врапчиште, во чиј дом нашла ловечка пушка – карабин. Заедно со карабинот, гостиварските органи на редот на дедото му ги пронашле и резервите од муниција – вкупно 55 куршуми.
„ОВР Гостивар поднесе кривична пријава против Ј.С.(82) од с.Врапчиште, гостиварско, поради постоење основи на сомнение за сторено кривично дело „неовластено изработување, држење, посредување и тргување со оружје или распрскувачки материи“. Пријавениот поседувал ловен карабин калибар 7,46 мм, 54 куршуми со калибар 7х64 и еден куршум со калибар 7х64 R, кои ги чувал во својот дом без соодветна дозвола издадена од надлежен орган,“ се вели во соопштението на МВР за овој последен, силен удар врз нелегалното оружје во земјава.