Пад на Македонија во извештајот на Фридом хаус: Назадување во владеењето на правото и борбата со корупција

Од:

Македонија е сместена во групата на „циклични хибриди“ во најновиот извештај на Фридом Хаус – „Нации во транзит 2024“. Во извештајот се нотира дека не се преземени чекори за елиминирање на корумпираните покровителски мрежи, како и дека моќта продолжува да осцилира меѓу коалициите на истата група партии. Според оценката, Македонија бележи опаѓање – од ланската 3.86 на 3.79.

„Во Северна Македонија, надежите што се зголемија во 2017 година по соборувањето на антидемократскиот премиер Никола Груевски допрва треба да се остварат. За разлика од Украина или Молдавија, Северна Македонија не презеде големи чекори за елиминирање на корумпираните покровителски мрежи, а моќта продолжи да осцилира меѓу коалициите на истата група партии, како што тоа го правеше со децении. Националистичката партија на Груевски ја опструираше работата на парламентот како опозиција и е фаворизирана да победи на претседателските и парламентарните избори во 2024 година. Ниту Груевски, ниту неговите најблиски соработници не беа изведени пред лицето на правдата за нивните злоупотреби на функцијата пред 2017 година. Уште полошо, контроверзните измени на кривичниот законик во 2023 година ги намалија казните за таквите злоупотреби, предизвикувајќи исфрлање на историските случаи додека јавноста веќе се оптоваруваше од фатални корупциски скандали во здравството. Годината, исто така, имаше поларизирачка парламентарна дебата за уставните амандмани кои беа потребни за укинување на ветото на Бугарија на кандидатурата на земјата за пристапување во ЕУ“, стои во извештајот на Фридом Хаус.

Фридом Хаус наведува и освен големи назадувања на Македонија во владеењето на правото, има и постојана корупција на високо ниво во текот на годината, нагласувајќи го судирот на партиите околу уставните измени, неопходни за државата да го продолжи патот кон Европската Унија.

Според оценката, Македонија е меѓу земјите во кои редовните промени во владејачката елита предизвикуваат недостиг на значајни структурни промени, но и земја во која ривалските партии во кои доминираат личностите или личните определби на нивните лидери, постојано ги политизираат и заробуваат слабите институции. Оваа категорија на држави се карактеризира со „комбинацијата на политички плурализам и површни институционални промени“.

Од седумте категории кои беа оценувани, кај нас нема промени во оценката за пет – национално демократско владеење, изборен процес, граѓанско општество, независни медиуми и локално демократско владеење. Падот се нотира во во категориите „судска рамка и независност“, и „корупција“.

Освен Македонија, во регионот назадуваат Црна Гора, која падна од 3.79 на 3.75, Босна и Херцеговина од 3.21 на 3.18 и Србија, која бележи најголем пад, од 3.79 на 3.61. Албанија, Хрватска и Косово имаат непроменета оцена.

Во групата „циклични хибриди“, Македонија е во друштвото на Албанија, Црна Гора, Босна и Херцеговина и Ерменија. Косово, Украина и Молдавија се сместени во групата „демократизирачки хибриди“, додека пак Србија, Унгарија и Грузија се во групата „автократизирачки хибриди“.

Би можело да ве интересира

Мицотакис: Во овие околности меморандумите нема да се ратификуваат во грчкиот Парламент

Фамелос: Ратификацијата на меморандумите ќе ја унапредеше соработката

Маринакис: Другата страна не ги почитува основните работи, односно името на земјата, која не се вика Македонија, туку Северна Македонија

Каселакис: Меморандумите се позитивни за Грција и од геополитички и од економски причини

Комисијата на ЕУ ги повика Скопје и Атина да се држат до договорот за промена на името

Орце Костов

Герапетритис: Граѓаните на Северна Македонија не би сакале да ги стават во опасност односите со Грција