Засега нема ништо од најавите за нови масовни протести во Скопје по денешната молитва во Јајапашината џамија во Чаир. Повеќето од верниците по завршувањето на петочната молитва си заминаа, а пред џамијата останаа педесетина помлади лица кои повремено го блокираат сообраќајот.
По минатонеделните насилни протести, преку социјалните мрежи имаше повици за нови собири денеска и утре.
Полицијата презеде превентивни мерки за спречување на евентуално нови нереди. Полициски патроли има на критичните места и на автобуските постојки. МВР ги повика сите општествени чинители, вклучувајќи ги и медиумите и невладините организации, активно да се вклучат и да го дадат својот придонес за смирување на страстите.
– Без разлика што никакви протести не се формално најавени, врз основа на оперативните сознанија и информации, полицијата ќе ги преземе сите неопходни мерки, а против сите кои би предизвикувале или би учествувале во какви било инциденти ќе следуваат најостри санкции. Граѓаните кои размислуваат да учествуваат во некакви протести не смее да дозволат да бидат изманипулирани и вовлечени во какви било сценарија бидејќи товарот на одговорноста ќе падне врз нивниот грб, соопшти МВР.
Во неколку скопски училишта, денеска има скратени часови со цел попладневната смена да заврши порано.
Осуда за инцидентите и апел за смирување на ситуацијата упатија и Исламската верска заедница и Комисијата за односи со верски заедници и религиозни групи, како и ЕУ и Амбасадата на САД.
Протест беше организиран и минатата сабота кој ескалираше во улично насилство во кое беа повредени повеќе граѓани, полицајци, демолирани автомобили, а беше и запален еден автобус на ЈСП.