„Основното јавно обвинителство Охрид постапувајќи по кривична пријава, донесе Наредба за спроведување на истражна постапка против едно лице за сторено кривично дело Неовластено производство и пуштање во промет на наркотични дроги, психотропни супстанции и прекурсори од член 215 од Кривичниот законик.
Дрогата – марихуана со тежина од околу 100 килограми е најдена во патничко моторно возило со скопска регистарска таблица кое се движело по патот Св. Наум – Охрид. Во возилото биле две лица, од кои возачот се дал во бегство и во моментов е недостапен на органите на прогонот.
Совозачот, жител на Битола, е лишен од слобода и против него е започната постапката за стореното дело. Надлежен јавен обвинител достави предлог до Основниот суд Охрид за определување на мерка Притвор, кој предлог е потврден со Решение на судот со кое му е определен притвор во времетраење од триесет дена.“ се вели во соопштението на ОЈО.