Одбраната на екс министерот за транспорт Миле Јанакиески бара еден дел од 608 докази за предметот Топлик да бидат презентирани. Адвокатите велат дека селектирале 83 докази кои сметаат дека треба да се читаат и презентираат на рочиштето, предлог на кој од СЈО реагираа дека на овој начин само се одолговлекува постапката.
– Одбраната си одлучила кои докази да ги чуе јавноста, а кои не. Вака се оптоварува записникот и се одолговлекува постапката. Сите докази се битни, не само 83, рече обвинителката Лиле Стефановска.
Одбраната претходно побара и вештачење на „бомбите“ бидејќи се сомневаат во нивната автентичност.
-Автентичноста е дискутабилна и спорна поради фактот што се презентираат копии од телефонски разговори, па при трансферот од примарниот систем на МВР за легално следење на комуникациите, на друг електронски медииум се отвора можност за нивна измена и нецеловитост, реагираше адвокатката Сања Алексиќ, во однос на претходното рочиште кога беа презентирани “бомбите”.
Галена Николовска – Ризвановиќ