Во Кривичниот суд денеска треба да се одржи рочиште за предметот на СЈО, „Триста“, во кој обвинет е поранешниот помошник-министер за внатрешни работи Ѓоко Поповски за злоупотреба на службена должност во врска со јавна набавка на 300 возила.
Претходните две рочишта беа одложени поради недоаѓање на Поповски, кој преку своите адвокати достави медицинска документација дека има отворено боледување.
Обвинителката Фатиме Фетаи смета дека не може да се чека со години и судењето да зависи од желбите на обвинетите.
Таа на последното рочиште побара медицински вештак да утврди дали Поповски може да присуствува на рочиштата.
Поповски се сомничи дека го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.