Прво по измените во Кривичниот законик, денешното рочиште за предметот „Титаник“ ќе покаже како обвинителството ќе постапува по законските одредби кои власта ги промени по брза постапка и со европско знаменце.
Во предметот, делото „злосторничко здружување“ е единственото кое е изменето со гласањето на пратениците, а досега не беше застарено за експремиерот Никола Груевски и поранешниот владин генерален секретар, Кирил Божиновски. Бидејќи измените предвидуваат максимална затворска казна од три години, наместо во 2024 година, за нив делото веќе е застарено.
Претходно, делото застаре за 14-мина кои беа обвинети дека го сториле делото, а како организатори беа посочени Никола Груевски, Миле Јанакиески, Кирил Божиновски, Гордана Јанкулоска, Мартин Протоѓер. Но со сегашните измени, делото застарува и за организаторите, од кои тројца признаа вина и веќе ги одлежуваат казните.
На товар на обвинетите сега ќе останат делата „повреда на избирачкото право“, „повреда на слободата на определување на избирачите“, „поткуп при избори и гласање“, „уништување изборен материјал“ и „злоупотреба на средства за финансирање изборна кампања“.