Новиот шеф на албанската дипломатија Алдо Бумчи вчера попладне имал средба со македонскиот амбасадор во Тирана Веле Трпевски по повод преземањето на новата функција.
Амбасадорот Трпевски, како што стои во соопштението кое го пренесуваат албанските медиуми, откако му ја честитал новата функција на Бумчи, високо го оценил нивото на соработка меѓу двете земји. Тој посебно се заблагодарил за подршката што Албанија ја дава за зачленување на Македонија во НАТО.
Скорешната посета на Бумчи на Македонија, според Трпевски, е многу значајна за интензивирање на политичкиот дијалог.
Министерот Бумчи изјавил дека многу добрите односи и соработка меѓу двете земји игра значајна улога за стабилноста на регионот. Откако оценил дека застапеноста на Албанците во јавната администрација е подобрена, нагласил дека многу значајно е целосното спроведување на Охридскиот договор.
Двајцата соговорници се согласиле дека е потребно унапредување на економската сработка, зголемување на трговската размена, реализиација на заеднички прокети од патната и енергетската инфраструктура, како што се Коридорот 8 и 400 киловолтниот далновод Битола-Елбасан.