Ниту една од парламентарните партии освен ВМРО-ДПМНЕ не смета дека нови избори се решение за излез од кризата. Партиите на Албанците за А1он велат дека платформата, или како што тие ја викаат декларацијата не е поврзана со избори. Велат, таа ќе остане и во иднина и тие ќе ги поддржат точките без разлика дали се власт или опозиција.
Портпаролот на ДУИ, Бујар Османи за А1он вели дека избори не се решение за кризата.
– Треба да се почитува Уставот и да се даде мандат на мнозинството со цел да се формираат институциите, вели Османи.
Тој не одговори конкретно на прашањето дали ДУИ би ја променила одлуката за коалиција, туку само кратко одговори дека тоа е хипотетичка ситуација.
Ниту Движењето БЕСА не смета дека изборите се излез од кризата, иако како што велат, доколку би се одржале, БЕСА би била сигурен победник во албанскиот политички блок.
– Сметаме дека излез од оваа криза е формирањето на една стабилна политичка влада. Во повеќе наврати сме кажале дека со ова раководство на ВМРО-ДПМНЕ не сме отворени за никаква соработка, вели за А1он шефот на кабинетот на лидерот на БЕСА, Фатон Фазлиу.
Тој појаснува дека декларацијата не е поврзана со избори, туку залагање дека партиите на Албанците ќе ги поддржат точките на таа декларација сега и во иднина, без разлика дали се дел од власта или опозицијата.
Социјалдемократскиот сојуз на Македонија во неколку соопштенија истакна дека и за нив не се прифатливи нови избори, а против избори беше и Алијансата на Албанците на Зијадин Села.
Против избори се изјаснија и партиите кои излегоа на изборите на 11. декември, но не освоија ниту еден мандат во Собранието.
Александар Тодески