Од градското јавно претпријатие „Лајка“ велат дека не се одржала за денеска планираната средба на раководството на претпријатието и претставници на здруженијата за заштита на животните. Според „Лајка“, ова е чеврта покана за средба, која не ја прифаќаат активистите, за кои, пак, е неприфатливо стационарот да им наплаќа големи суми пари на сопствениците на изгубени кучиња кои ќе ги заловат во „Лајка“.
„И покрај сите напори да се оствари средба со здруженијата за заштита на животните, во интерес на транспарентноста, би сакале да ја информираме јавноста дека на состанокот не се појави ниту еден претставник. Ова е четврта официјална покана со цел да оствариме заедничка соработка во насока на подобрување на благосостојбата на бездомните кучиња на територијата на град Скопје, точно и навремено информирање и надминување на сите недоразбирања“, велат од јавното претпријатие.
„Воедно би сакале да им се заблагодариме на сите поединци и волонтери кои активно се вклучени во процесот на вдомување, нега, активно лоцирање на проблемите на терен и подобрување на благосостојбата на кучињата во прифатилиштето на ЈП Лајка. Заедно, можеме многу повеќе?“, пишуваат од градското јавно претпријатие на Фејсбук.