Поради отсуство на адвокатите на ВМРО-ДПМНЕ, Дончо Наков и адвокатот на Илија Димовски, Петат Василев, повторно, по вторпат беше одложено судењето за случајот „Талир” на СЈО.
Судијата го добил поднесокот од адвокатот Василев 15 минути пред почетокот на судењето во кое пишува дека ќе оди на патување во странство. Адвокатот Донче Наков, кој е бранител на ВМРО-ДПМНЕ, воопшто не се појави на судењето. Судијата Осман Шабани ги опомена обвинетите и нивните адвокати дека еднаш поради отсуство на Илија Димовски дозволил одлагање, но тоа понатаму нема да го дозволува.
„Во иднина тоа нема да го толерирам”, рече Шабани, кој само ги опомена и не ги казни адвокатите за неприсуство. Следните рочишта се закажани за 2 и 16 април.
Во предметот „Талир“ обвинети се поранешниот лидер на ВМРО-ДПМНЕ, бегалецот Никола Груевски, ексгенералниот секретар на Владата, Кирил Божиновски, поранешниот министер за транспорт и врски, Миле Јанакиески, пратеникот Илија Димовски, Леко Ристоски и Елизабета Чингаровска, која лани призна вина и доби условна казна.
СЈО тврди дека обвинетите незаконски добиле најмалку 4,6 милиони евра во готовина, а потоа организирале тие пари да бидат уплатени на жиро-сметката на партијата преку уплатници на различни имиња. Тие се обвинети за злоупотреба на службената положба и овластување и за перење пари.
Васко Маглешов