Универзитетот „Св. Климент Охридски“-Битола денеска ги почна неколкудневните програмски активности посветени на денот на своето формирање – 25 април.
Традиционално, во пресрет на универзитетскиот роденден, на Педагошкиот факултет се одржа студентски натпревар во ораторство „УКЛО Тривиум“, на кој годинава учествуваа 17 студенти. Првото место го освои студентката Моника Нелческа.
– Конкуренцијата беше голема, а првото место заслужено и припадна на Моника Нелческа, студентка на Педагошкиот факултет во Битола. Стручното жири предводено од профсорката д-р Оливера Костоска одлучи второто место да и го додели на Лина Димоска од Економскиот факултет во Прилеп, а Симона Видановска, студентка на Правниот факултет во Битола, го освои третото место. Трите заедно ќе го претставуваат УКЛО на државниот натпревар во ораторство кој на 5 мај ќе се одржи на УКИМ во Скопје, истакна Елизабета Атанасоска од Секторот за односи со јавност во Ректоратот на УКЛО-Битола.
Свеченостите по повод денот на основањето на УКЛО-Битола продолжуваат утре со промоција на Фондацијата „Тома Фила“ која во иднина ќе го стипендира најдобриот студент од Правниот факултет при УКЛО, а ќе завршат во среда со промоција на доктори на науки.
