18-годишен велешанец вчера ја нападнал и со нож ја повредил една година помладата невенчана сопруга, соопшти Министерството за внатрешни работи.
„На 13.07.2021 од полициски службеници од СВР Велес е лишен од слобода Е.А.(18) од Штип, бидејќи околу 16.30 чaсот на ул.„Нада Бутникошарева“ во Велес, физички ја нападнал неговата невенчана 17-годишна сопруга, исто така од Штип, при што со остар предмет ѝ нанел повреди. Таа била пренесена во болницата во Велес за укажување на лекарска помош“, се вели во полицискиот билтен.
По овластување на Јавен обвинител бил извршен увид од страна на увидна екипа од СВР Велес, а по документирање на случајот ќе следува соодветен поднесок, додаваат од полицијата.
Околу случајот се огласи и Oсновното јавно обвинителство Велес, кое соопшти дека донело наредба за спроведување истражна постапка против велешанецот. Според ЈО 19-годишниот насилник ќе одговара за обид за убиство при вршење на семејно насилство.
„На 13 јули попладнето осомничениот дошол во Велес заедно со својата вонбрачна сопруга во куќа во која живеел под кирија. Помеѓу нив настанала вербална расправија, при што осомничениот со нож на преклопување ја прободел оштетената три пати и тоа во десната страна на слабината, десното колено и левата потколеница, нанесувајќи и на тој начин телесни повреди, по што заминал од куќата“, велат од Обвинителството.
Велешкото обвинителство до судијата на претходна постапка на Основен суд Велес поднесе предлог за определување мерка притвор против осомничениот. Предлогот е прифатен и на осомничениот му е определен притвор во траење од 30 дена.