Следната година ќе се изработува долгорочната ИКТ стратегија на Република Македонија, за која ресорното Министерство бара вклучување на трите информатички здруженија во државава.
Министерката за информатичко општество и администрација Марта Арсовска – Томовска и претставници на Сојузот на стопански комори и на Здружението на информатичко-комуникациски технологии при Стопанската комора на РМ, на состанок ги анализирале Краткорочната ИКТ стратегија 2016-2017 и нејзиниот акциски план, кои се основа за изработка на долгорочната стратегија.
– Разгледани се тековните и идни планови за реализација на предвидените активности и мерки и се изнесени предлози и сугестии за понатамошен развој на информатичкото општество во Македонија, соопшти денеска Министерството за информатичко општество и администрација (МИОА).
Целта на стратегијата е да се зголеми придонесот на ИКТ индустријата во насока на одржлив економски развој и создавање нови работни места во рамките на ИКТ и други поддржани индустрии.
На состанокот се разговарало и за дигиталната трансформација на општеството, поголема конкурентност на македонските ИКТ компании и производи, како и брендирање и позиционирање на македонската ИКТ индустрија.