Целокупната изведба на скулптуралната композиција посветена на Мајка Тереза ќе чини 5,6 милиони евра или 345.915.260 денари, велат од Министерството за култура по објавените информации дека вкупната сума за овој проект ќе достигне 10 милиони евра.
Сметката од 5,6 милиони евра ги вклучува трошоците за основниот проект, договорот за ревизија на основниот проект, договорот за стручен надзор и договорот за изградба на објект. По се изгледа не се пресметани хонорарите за уметниците кои стојат зад идејното решение на споменикот: Валентина Стефановска и Кирил Мукаетов.
„Основниот проект за објектот скулптурална композиција изнесува 2.808.400,00 денари, вредноста на договорот за ревизија на основниот проект изнесува 354.000,00 денари, вредноста на договорот за Стручен надзор за изградба е 528.934,00 денари, додека пак вредноста на објавениот договор со Друштвото за градежништво „Бетон“ АД Скопје, е со износ од 342.223.926,00 денари со ДДВ“, велат од Министерство.