Претседателот на ВМРО-ДПМНЕ, Христијан Мицкоски при денешната негова посета во струмичкиот регион посочи дека кога нема јасна линија помеѓу владата и криминалот и кога половина припадници на балкански картели со дрога имаат македонски пасоши кои што им се издаваат овде тогаш е нормално да криминалот си има своја држава.
-Кога нема јасна линија помеѓу владата и криминалот, кога половина припадници на балкански картели со дрога имаат македонски пасоши кои што им се издаваат овде, тогаш нормално е криминалот да си има своја држава, и за жал тоа е нашата Македонија. Затоа велам колку побргу заминат толку побргу ќе дојде крајот на ова девијантно однесување, рече Мицкоски.
Претседателот Мицкоски во врска со убиството кое се случи пред некој ден потенцираше дека сето ова се случува затоа што во Македонија тој што треба да го гони криминалот е ортак со криминалот.
-Инаку на 300 метри од центарот на Скопје да се случи едно вакво убиство, луѓе со автоматски пушки да си шетаат и тоа не еден туку четворица, на 300 метра ќе повторам од центарот на главниот град, ниту во најлошите кинематографии не можете да го сретнете, но ете за жал многу очевидци тој ден, во тој локал или во околината видоа како се врши брутална егзекуција на луѓе. Тоа е причина само поради тоа што немаме јасна поделба помеѓу тој што треба да го гони криминалот и да биде ортак со него. За жал кај нас тој што треба да го гони криминалот е ортак со криминалот, додаде Мицкоски.