Ќе создадеме подобри услови за младите во Кавадарци, порача Бетиане Китев, кандидат за градоначалник од редовите на СДСМ и коалицијата на денешната прес-конференција.
– Десет години младите беа заборавени од власта на ВМРО-ДПМНЕ. Многу од вашите другари и другарки се иселија во странство во потрага по подобарживот. Но локалната власт на ДПМНЕ, осум години не најде време и средства да направи нешто повеќе за младите од Кавадарци, нагласи тој.
Соопшти дека на просторот на поранешната дискотека Ла Луна, кој е целосно запуштен, ќе никне современ младински културен центар, каде младите ќе може да творат, да се дружат, да дебатираат.
– Младите конечно ќе добијат свој простор каде ќе може да го реализираат својот креативен потенцијал. Во соработка со Владата, ќе изградиме бизнис и старт-ап центар во Кавадарци, каде младите кавадаречки претприемачи ќе добијат бесплатни простории и бесплатни правни и сметководителски услуги, посочи Китев.
Вети реконструкција на градскиот базен во Кавадарци и натпревари за млади иноватори.
-Најдобрите идеи и проекти ќе бидат финансирани од општината за да го презентираат својот изум/проект на саеми во странство. Ќе ги стипендираме десетте најдобри студенти од техничките факултети. Нема повеќе да дозволиме талентираните инженери од Кавадарци да ни бегаат во други градови или во странство, додаде тој.