Македонците и Србите пазарат повеќе пати во неделата, додека Словенците само еднаш, покажува истражувањето на потрошувачките навики во земјите од поранешна Југославија, спроведено од Институтот за истражување на пазарите и медиумите „Медијана Адрија“ во Македонија, Словенија, Србија и Хрватска.
Според менаџерот на проектот „Медијана“ Борислав Радојковиќ, анализата на одговорите на испитаниците покажува голема разлика меѓу потрошувачите на релативно мал пазар.
Истражувањето покажува дека најчесто пазарат Србите и Македонците, од кои три четвртини двапати неделно, а голем број и секојдневно. Најретко во продавница одат Словенците, од кои една четвртина пазаруваат еднаш во неделата.
Додека Србите и Македноците купуваат намирници за пократок временски рок, Словенците и Хрватите пазаруваат за подолг период. Исто така, тие повеќе ги посетуваат големите пазарни објекти, додека во Србија популарни се локалните продавници.
– На неделно ниво по потрошувачка за храна, Словенците се на прво место, по нив следат Хрватите, а значително помалку трошат Србите и Македонците, наведува Радојковиќ.
Околу 30,7 проценти од српските потрошувачи имаат специјален ден за пазарување, додека 20-30 проценти од Словенците немаат посебен ден за пазарување.
Карактеристично е тоа што просечната километража што Словенците ја минуваат за купување е шест километри, додека во Србија таа изнесува 1,97 километри. Согласно со тоа најголем процент од Словенците и Хрватите на пазарување одат со автомобил, додека 61,7 проценти од Македоницте и 52,3 отсто од Србите пеш.
Интересно е тоа што дури 38 проценти од Словенците ги читаат декларациите на производите, додека таква навика имаат само 20 проценти од населението во Македонија.