Овој успех денеска е успех на сите во Република македонија, изјави во среда премиерот Никола Груевски, по средбата со евроамбасадорот Аиво Орав, кој му го врачи Извештајот на ЕК за напредокот на земјата.
Според Груевски, пристапниот дијалог на високо ниво имал големо влијание и претставувал дополнителен мотив при спроведувањето на реформите.
Амбасадорот Орав порача дека оваа година власта направила многу добри работи, но дека останува заложбата да се продолжи со реформите.
„Извештајот за напредокот оваа година е навистина за напредок”, рече Орав.
Тој додаде дека ова е четврт извештај на ЕК на кој се препорачува старт на пристапните преговори, но дека овој пат за разлика од претходните три, како што рече, препораката е дадена поинаку.