Еднократен отпис на достасани долгови за вода и ѓубретарина заклучно со септември годинава за граѓани од социјално загрозени семејства и проект за стекнување на сопствен дом, најави претседателот на ВМРО-ДПМНЕ Никола Груевски на вечерашниот митинг во Шуто Оризари на Коалицијата „За подобра Македонија“.
Тој им порача на граѓаните дека тие одлучуваат каква ќе биде Македонија по 15 октомври и дека ја носат одлуката за иднината на градовите и државата.
– Во сите општини во кои ќе победат градоначалници од ВМРО-ДПМНЕ и Коалицијата За подобра Македонија, ќе извршиме еднократен отпис на достасани долгови за вода и ѓубретарина заклучно со септември годинава, за граѓани од социјално загрозени семејства. Отписот на долгови ќе биде донесен како мерка на првата седница на новиот Совет и ќе стапи во сила од ноември, потенцира Груевски.
Со проектот за стекнување на сопствен дом, посочи, ќе овозможиме семејствата кои немаат сопствен дом, да можат да дојдат до сопствен дом со многу пониски трошоци. Појасни дека општината ќе обезбедува
локации и земјиште за изградба на нови куќи кое ќе се купува за едно евро по метар квадратен.
– На семејства со приход до една просечна нето плата ќе има целосно ослободување од комуналии, а и земјиштето ќе им биде дадено бесплатно. За семејства со приход од една до две просечни нето плати ќе има 75 отстотно ослободување од комуналии, за оние со приход од две до три просечни плати 50 отстотно, а за семејствата со три до пет просечни плати 25 отстотно ослободување од комуналии, рече Груевски и додаде дека ослободувањата ќе може да се користат и за надградба на постоечки куќи.
Кандидатот за градоначалник на Шуто Оризари Елвис Бајрам порача дека се уште не е доволно опоравен од повредите што ги доби при неодамнешниот напад.
-Заради тоа мислам дека сите на 15 октомври ќе ги казниме и ќе излеземе на гласање и ќе победиме уште во првиот круг за да нема втор круг во Шуто Оризари, истакна Бајрам.