За време на оваа средба двајцата соговорници разговараа за важната и
конструктивна улога на Република Северна Македонија во унапредувањето на
односите меѓу земјите од Западен Балкан.
Груби истакна дека соработката со земјите членки на Европската Унија
останува главна цел на Владата и додаде дека очекува поддршка од
Унгарија за време на првиот меѓу-владин состанок со Европската Унија, на
кој се очекува да биде означен почетокот на преговорите за членство со
Република Северна Македонија.
На оваа средба, првиот вицепремиер Груби и унгарскиот амбасадор Дукс,
исто така разговараа и за мерките преземени во двете земји во врска со
здравствената и економската криза предизвикана од КОВИД-19, како и за
најдобрите начини за закрепнување од оваа ситуација што ги зафати нашите
две држави, но и целиот свет.
Груби исто така му рече на амбасадорот на Унгарија, г.Ласло Дукс дека
патот на неселективната правда и владеењето на правото во Република
Северна Македонија ќе се постигне само преку целосна транспарентност и
ветинг за носителите на јавни функции, судиите и обвинителите.
На крајот на состанокот, првиот вицепремиер Груби и амбасадорот
Дукс изразија убедување дека за време на германското
претседавање со Европската Унија, Република Северна Македонија ќе ги
надмине последните отворени прашања со Република Бугарија и со ова ќе го
продолжи процесот на интеграција во Европската Унија.