Шеесет и седум медиуми влегоа во првата фаза и за резултатите од креирањето Регистар на професионални онлајн медиуми. Во овој Регистар, во кој влезе и „А1он“ се онлајн медиумите кои имаат транспарентна сопственичка структура, кои објавуваат информативни содржини, кои ќе објават банер со кои се обврзуваат дека ќе ги почитуваат професионалните стандарди, а ќе ги објавуваат и одлуките на Советот за етика.
Дополнително, тие би требало да имаат ценовници за реклами, да се регистрирани на мк домејн, да имат најмалку еден уредник и двајца вработени.
Регистарот беше направен со цел читателите да знаат дека медиумот ги почитува стандардите и да се избегне ширењето дезинформации, пропаганда и лажни вести.
Овој Регистар „Промедиа“ беше изработуван половина година од страна на Советот за етика на новинарите на Македонија, Здружението на новинарите, а во соработка со Стопанската комора.
„Ова e отворен инклузивен процес не е конечен. Ова не значи дека во оваа прва фаза, понатаму нема да бидат, ова е фаза, жив процес. Ние како новинари сме способни сами да си го исчистиме сопствениот двор“, рече Катерина Синадиновска, претседателка на СЕММ.
Според претседателот на ЗНМ, Младен Чадиковски, ова е бескраен процес кој ќе трае.
„Промедиа не ја направивме само за бизнисмените, за да се спречат заканите од уценувачите, туку и за граѓаните, да ги препознаат оние што шират пропаганда и да знаат кому да веруваат, а за политичарите, еве шанса да покажете дека ги цените професионалните стандарди“, рече тој.
Слободна Европа, Дојче Веле, Либертас, Слободен печат, ИРЛ, Нова, Фокус, Фактор, Е-магазин, Капитал, Вечер, Фронтлајн, 24 инфо, Алмакос, Журнал и други.
Во регистарот не се внесени порталите како „Инфомакс“, „Курир“, „Република“ и други.
„Сите што не ги исполнуваат условите не се дел од овој список. Дел од нив покажаа желба да бидат дел од Регистарот, а ние им дадовме рок од 3 месеци да ги почитуваат стандардите “, рече Синадиновска.