Вистинска филмска сцена се случила вчера во скопската населба Маџари – полицајци бркале крадци на автомобил кои среде потера го оставиле и бегале пеш, а притоа имало и престрелка, соопшти МВР.
Вчера во 8 часот во Полициската станица Гази Баба, 51-годишен жител на Скопје пријавил дека претходната вечер на улицата „Среќко Пужалка“ било украдено неговото патничко возило „Форд Фиеста“, се вели во полициското соопштение.
„Истиот ден, на улица „Маџари“, полициски службеници го забележале возилото и почнале да го следат, а по кратко време лицата кои се превезувале го оставиле возилото и се дале во бегство,“ велат од МВР.
Крадците не застанале на предупредувањето, а пред да избегаат, еден од осомничените испукал куршум кон полицајците, но не ги погодил. Притоа, и еден од двајцата полицајци испукал еден куршум во воздух.
Возилото било вратено на сопственикот и се преземаат мерки за расчистување на случајот, додаваат од МВР.