Обвинителката на СЈО, Фатиме Фетаи побара ексминистерката за внатрешни работи Гордана Јанкулоска да не го напушта Скопје, поради опасност од бегство.
По денешното изрекување на пресудата, со која Јанкулоска е осудена на 6 години затвор за набавка на луксузниот владин „мерцедес”, Фетаи побара уште една мерка за претпазливост за ексминистерката – таа да не го напушта живеалиштето се до правосилноста на пресудата.
„Мерките на претпазливост не ја анулираат опасноста од бегство”, рече Фетаи. ,,Но, имајќи ги предвид семејните прилики и фактот дека има бебе кое не е виновно, предлагам судот да и’ изрече забрана за напуштање на живеалиштето”, рече обвинителката на СЈО.
Адвокатката на Јанкулоска, Сања Алексиќ, рече дека барањето на Фетаи е неосновано.Таа рече дека одбраната очекувала да чуе таква пресуда.
„Ако обвинетата сакаше да избега ќе избегаше досега”, рече Алексиќ. Јанкулоска беше присутна на сите рочишта, а имаше и две мерки на претпазливост, кои обвинетата беспрекорно ги почитувала, рече нејзината адвокатка.
Поранешната министерка за внатрешни работи Гордана Јанкулоска е осудена на казна затвор од 6 години за набавката на луксузниот владин „мердецес”. Таа треба да ги надомести и судските трошоци во постапката.Јанкулоска е осудена за злоупотреба на службена должност и овластување,односно дека го поттикнала помошник-министерот во МВР, Ѓоко Поповски да изврши кривично дело. На ексминистерката ѝ се судеше во раздвоена постапка во предметот „Тенк“, бидејќи имаше ризична бременост. Случајот „Тенк“ на СЈО е за набавката на луксузниот „мерцедес“ вреден 600 илјади евра.
Поранешниот премиер Никола Груевски за овој случај веќе е осуден на две години ефективна затворска казна, а помошникот во министерството Ѓоко Поповски доби намалување од шест и пол на четири и пол години казна затвор на скопска Апелација.
Јанкулоска во завршните зборови побара ослободителна пресуда со образложение дека немала намера никому да влијае и да врши притисок.
Васко Маглешов