Екипи на ЕВН активно работат на санирање на штетите и воспоставување на напонска состојба на двата далекувода што беа оштетени при вчерашниот пожар кај езерот „Младост“ во Велес. Екипите на Електродистрибуција од Велес ќе останат на терен се додека се нормализира снабдувањето со електрична енергија, инфомрираат од компанијата.
-Екипите на Електродистрибуција од Велес од самиот почет на пожарот кој вчера ја зафати околината на езерото „Младост“ активно учествуваа во неговото гаснење. Од пожарот во кој изгореа 500 хектари шума, од кои 200 хектари црноборова, беа зафатени и три средно напонски далекуводи на ЕВН: 10 киловолтниот далекувод Езеро, 10 киловолтниот далекувод Црн Врв – стар и 35 киловолтниот далекувод Црн Врв – нов. Екипите заедно со против пожарните служби успеаја да спасат дел од дистрибутивната мрежа, соопшти ЕВН.
Далекуводот „Црн Врв – нов“, посочуваат, најбрзо беше саниран и веднаш пуштен под напон.
-Другите два далекувода поради обемот на штетата и поради сугестиите на Центарот за справување со кризи беа без напон подолго време. Далекуводот Езеро е 50 отсто уништен од пожарот, а далекуводот Црн Врв – стар има штета од 30 отсто, велат од ЕВН.
