Владите на Европската унија одлучија денес да ги отворат своите граници за граѓаните на уште 14 земји, меѓу кои ја нема Македонија. Одлуката, сепак, е необврзувачка, што значи дека секоја земја ќе може самостојно да одлучи за кои други земји ќе ги отвори своите граници.
На списокот се: Србија, Црна Гора, Канада, Австралија, Алжир, Тунис, Нов Зеланд, Грузија, Јапонија, Мароко, Руанда, Јужна Кореја, Тајланд и Уругвај. Кинезите исто така ќе можат да влезат во ЕУ, но само ако Кина сооопшти дека и таа ќе прифати европски посетители.
Одлуката е донесена врз основа на епидемиолошката состојба во земјите од каде што доаѓаат посетителите, а листата редовно ќе се ажурира, соопштено е во Брисел.
Европската комисија, извршниот орган на ЕУ, инсистираше надворешните граници да се реотворат на координиран начин з да се избегне хаос во транспортот, но на крајот сепак одлуката е да се оди со одлуки во секоја земја посебно.
Границите на ЕУ ќе останат затворени и за државјаните од САД, која е земја со најголем број заразени од коронавирус во светот – 2.6 милиони.