„Единствена Македонија го поздравува најновиот извештај на мониторинг комисијата на Парламентарното Собрание на Советот на Европа во кој се вели дека Бугарија не ги признава Македонците во Бугарија и дека во Бугарија има расизам и дискриминација во однос на Македонците во оваа земја.
Од друга страна, марионетската власт во Скопје со Договорот со Бугарија (член 11) се откажа од грижата за Македонците во Бугарија со што на своевиден начин го избриша постоењето на Македонците во оваа соседна земја.
Македонците во Бугарија сега се наоѓаат во една крајно незавидна и апсурдна состојба во која странците, односно, скоро сите европски држави кои членуваат во Советот на Европа ги признаваат како Македонци во Бугарија и се загрижени за нивната положба оти ниту македонски јазик, ниту историја не се учи во бугарските училишта, а власта на Зоран Заев во Македонија не ги признава Македонците во Бугарија со тоа што се откажа од нивна заштита и ги избриша со Договорот со Бугарија.
Единствена Македонија како партија која во основа се бори за одбрана на националните интереси има готов концепт како со своите странски пријатели ќе се избори за почитување на меѓународните документи за почитување на малцинските и човековите права и во оваа насока Договорот со Бугарија кој е штетен за Македонците во Бугарија, ќе биде поништен“, се вели во соопштението на Единствена Македонија.