Вчеравечер, околу 1 часот по полноќ, на улицата Рајко Жинзифов во центарот на Скопје, полицијата привела 37 годишен скопјанец кој под дејство на алкохол ги вознемирувал соседите, ги навредувал, пуштал гласна музика, а потоа, откако била повикана полиција, агресивно се однесувал и кон полицајците.
Од МВР за „А1он“ го потврдуваат случајот и велат дека Д. А. под дејство на алкохол агресивно се однесувал кон околината, како и кон полициските службеници, кои, по пријава од соседите, пристигнале на местото со цел да ја утврдат состојбата.
Драмата во близина на Амбасадата на Романија траела два часа.
Неговите соседи реагирале неколкупати барајќи помош од полицијата. Тие се јавувале повеќепати на бројот на полицијата, а реагирале и кај полициското обезбедување на романската амбасада.
„Сè почна со пуштање многу гласна музика, сите преплашено станавме и веднаш излеговме на терасите да видиме што се случува. Забележавме дека музиката доаѓа од соседот и по некое време тој почна да крши внатре во станот и да извикува погрдни зборови за женска личност: ‘к**во една, сè ми зема, младоста ми ја зема, одиш со други, ќе дојдам кај тебе и ќе те убијам’“, рече сведок на настанот.
Според очевидците, тој во својот стан бил со мајка си, која цели два часа се обидувала да го смири, но не успеала.
Закани биле упатени и кон соседите, кои се обидувале да ја спречат драмата.
Од МВР велат дека во моментот се преземаат мерки за расчистување на случајот.