Друштвото на писателите на Македонија, се огласи третиот ден откако Комисијата за верификација на факти, го прогласи авторот на првиот македонски роман, Славко Јаневски, за соработник на тајните служби.
Еве што пишува во соопштението пратено до медиумите:
„Друштвото на писателите на Македонија бара одговорност за антиуставниот и бескруполозен обид за уривање на темелните вредности на македонската национална култура.
Друштвото на писателите на Македонија со огорченост ја отфрла апсурдната слика на Комисијата за верификација на фактите со која писателот Јаневски е прогласен за соработник на тајните служби.
Друштвото на писателите на Македонија бара одговорност заради овој антиуставен чин на Комисијата за верификација на фактите која посегна по една од најсветлите личности на современата македонска литература и култура, надвор од нормите што ги подразбира законот за лустрација. Во спротивно ДПМ овој чин ќе го толкува како тенденција за бескрупулозно газење и уривање на темелните вредности на македонската национална култура.
Апсурдно е да се помисли дека дејствувањето на Славко Јаневски во литературата и културата било на штета на развојот на одредени автори и процеси. Напротив, делото на овој писател цврсто е втемелено во основите на современата македонска литература.
Од денешен аспект, 13 години по смртта на Јаневски, неговото творештво и неговата мисија се уште позначајни како писател и културен деец, како еден од иницијаторите за основање на Друштвото на писателите на Македонија, претседател на македонската писателска асоцијација, еден од првите членови на МАНУ, еден од оснивачите на Македонскиот ПЕН центар, член на оснивачкиот одбор на Струшките вечери на поезијата, покренувач на списаниија, издавачки куќи и институции од областа на културата.
Јаневски е автор на првиот македонски роман и на обемен, разновиден и значаен опус како поет, раскажувач, романсиер, публицист, сценарист и редактор на капитални дека за македонската национална културна историја. Овие аргументи силно пркосат пред апсурдната и злонамерна одлука на Комисијата за верификација на фактите со која писателот Славко Јаневски е прогласен за соработник на тајните служби“.