Бројот на заразени со „делта-сојот“ во земјава се искачи на десет лица откако беше потврдено дека тој е присутен кај четворицата сомнителни за кои вчера соопшти министерот за здравство Венко Филипче.
Како што дознаваме, станува збор за свекор и за снаа, од кои свекорот е во потешка состојба и е поставен да дише на респиратор. Тие живееле во заедница и биле дојдени од странство, но нема докази дека вирусот го донеле однадвор. Останатите двајца се брачен бар, Американци, исто така дојдени од странство кои се веднаш хоспитализирани и нивната состојба е стабилна.
Ниту еден од нив не бил вакциниран.
Во моментов епидемиолозите вршат проверки на нивните контакти.
Министерот за здравство Венко Филипче денеска повторно апелираше дека вакцинацијата е единствен начин за заштита од делта-сојот и дека во понеделник со Комисијата за заразни болести ќе се разгледува можноста за воведување нови рестриктивни мерки.
„Состојбата генерално е мирна, некаде нема ниту еден хоспитализиран во болниците во државата, а некаде дел од ковид центите се целосно затворени. Со Комисијата со заразни болести во понеделник ќе се разгледува за потребата од нови рестриктивни мерки. Ова е ситуација која ни покажува колку е важно граѓаните да се вакцинираат. Погледнете ја Англија, индискиот сој е присутен, но има попуштање на мерките поради високиот процент на вакцинација“, изјави Филипче.
Тој додаде дека од понеделник, освен теренската вакцинација, ќе можат да се вакцинираат и децата над 12 години (со вакцината „Фајзер“), а граѓаните од понеделник ќе немаат потреба да закажуваат термини за вакцинација, туку директно ќе можат да одат на пунктовите и да примат вакцина.