Четворица вработени во Државната комисија за спречување на корупцијата (ДКСК) се позитивни на коронавирусот. Станува збор за вработените во службите на комисијата, а позитивен на Ковид-19 не е ниту еден член од комисијата.
Информацијата за „А1он“ ја потврди претседателката на ДКСК, Билјана Ивановска.
„Вработените се добри и ниту еден од нив нема симптоми. На докторите им го предочив ризикот од ставање на сите вработени и членови на комисијата во изолација, со оглед на тоа што во претстојниот предизборен период комисијата има зголемени надлежности во следењето на изборната кампања. Од тие причини, кај сите вработени и членови во понеделник ќе се изврши тестирање“, изјави за „А1он“ претседателката на ДКСК, Билјана Ивановска.
Антикорупциската комисија, откако почна корона кризата во земјава, седниците ги одржуваше без присуство на новинарски екипи.