Градоначалникот на Општина Чаир, Изет Меџити информираше дека Општината започнала со конкретни чекори за создавање заедничка платформа за превенција и справување со врсничкото насилство во училиштата во Чаир.
Платформата ќе ги обедини општината, училиштата, психолозите и стручните служби, наставниците и родителите, со цел да се воспостави координиран и долгорочен пристап. Во нејзини рамки се предвидуваат едукативни активности, директна работа со учениците и родителите, како и зајакнување на механизмите за превенција, навремено препознавање и справување со случаите на насилство.
„Безбедноста и благосостојбата на нашите деца бараат многу повеќе од реакција по одреден инцидент. Потребни се превенција, едукација и заедничко дејствување. Сакаме да дејствуваме пред да се случи насилството, а не само да реагираме на неговите последици. Секое дете има право да се чувствува безбедно, почитувано и заштитено во своето училиште, а одговорноста за тоа е заедничка“, изјави Меџити.
Општина Чаир преку оваа платформа има за цел да воспостави покоординиран систем меѓу сите вклучени страни, ставајќи ги превенцијата, безбедноста и благосостојбата на децата во центарот на институционалното дејствување.
И Министерството за образование и наука и Град Скопје набрзо ќе ги презентираат мерките со кои ќе се намали и спречи врсничкото насилство меѓу децата и учениците – најави денеска скопскиот градоначалник Орце Ѓорѓиевски. Тој на промоцијата на новите возила за комунална хигиена одговараше на прашање за сузбивање на врсничкото насилство меѓу децата, учениците, каков што и беше последниот случај во Скопје, а во кој 13-годишно момче беше прободено со нож и се бори за животот.
„Спремаме уште еден поголем сет мерки заедно во соработка со министерката за образование Јаневска, со која имаме одлична соработка, но и силна, силна поддршка во тој дел, така што во наредниот период ќе излеземе со цел сет мерки и ќе бидете сведоци на она што ќе го почнеме како процес, а ќе влијае. Убеден сум, на долг рок, за што помалку случаи такви да имаме“, изјави Ѓорѓиевски.
Тој истакна дека во процесот имаат вклучено и многу експерти и, како што рече, „многу бргу од денес ќе излеземе со сериозна, јасна платформа како Град Скопје“. Посочи и дека експертските тимови ќе работат со учениците, но ќе работат и со родителите.