Чаир, Гази Баба и Сарај се општините каде што има најголем број активни заболени лица од Ковид-19, покажуваат најновите статистики на Институтот за јавно здравје и Министерството за здравство.
Во моментов, во Скопје има 199 активни случаи на заболени од коронавирусот, a речиси 60 отсто од активните заболени се од трите скопски општини.
„А1он“ ја побара статистиката според општини, од која произлегува дека најмногу заболени има во Сарај – 41 лица, потоа следува Гази Баба – 39 лица, Чаир – 38 и Аеродром – 25. Во останатите општини има од еден до тринаесет заболени.
Денеска во Скопје беа регистрирани 12 нови случаи на Ковид-19. Од нив, најмногу се од Гази Баба – 5 лица, по двајца од Бутел и од Чаир и по едно лице од Сарај, Карпош и од Аеродром.
Вкупната бројка на ковид дијагностицирани во нашата земја од почетокот на епидемијата изнесува 1978, бројката на оздравени пациенти е 1422, на починати е 113, а во моментов бројот на активни случаи во земјата изнесува 443.
Најмногу активни случаи има во Скопје (199), Тетово (77), Прилеп (48), Велес (43) и Куманово (34).