Премиерот на Бугарија, Бојко Борисов, се извини што рекол северномакедонци во едно свое обраќање. Тој вели дека станува збор за грешка.
„Моја грешка е што реков северномакедонци, извинете. Граѓани на Северна Македонија, простете, но јас не сакајќи, го кажав тоа и беше претставено како да сакам некој да убијам. Не сакам да се извади некоја реченица од контекст“, рече Борисов, кој уште неколкупати повтори „тогаш згрешив“.
Борисов на почетокот од месецот, најавувајќи го славењето на Илинден, рече дека со северномакедонскиот премиер заедно ќе се поклони пред споменикот на Гоце Делчев, а според бугарските медиуми, по средбата со Стево Пендаровски во Сараево, бугарскиот премиер рекол дека северномакедонскиот претседател е првиот северномакедонски политичар што ги кажал нештата на најправилен начин.
Заев најави протесна нота, но таа не стигна до Софија.