Aмериканскиот амбасадор во Македонија Џес Бејли денеска рече дека САД од секогаш ја поддржувале Македонија и дека поддржуваат заеднички прифатливо решение за прашањето за името.
– Добро е што Македонија има разговори со Грција и другите земји во соседството. Нема да зборувам за исходите, за тоа ќе зборуваат само партнерите. САД од секогаш ја поддржувале Македонија и ќе продолжат да ја поддржуваат на нејзиниот пат и аспирација кон ЕУ и НАТО, рече Бејли.
Одговарајќи на новинарско прашање на конференција за „Актуелни предизвици на бизнис заедницата од областа на законската регулатива“, организирана од неколку стопански комори во рамки на Проектот на УСАИД – Партнерство за подобра бизнис регулатива, Бејли рече и дека реформите кои сега се носат се многу важни во однос на владеењето на правото.
– Допрва треба да дискутираме со новата Влада, како и со членовите на целото општество и опозицијата, за чекорите кои ќе ги преземаме. На крајот овој процес ги вклучува целото општество и целата држава и сметам дека тоа ќе биде нешто за што целата земја треба да се обедини за да го постигне, изјави Бејли.
