Земјоделците да не ги палат стрништата и сувите остатоци по дворовите и сите да се воздржат од какво било палење оган на отворено, апелираа денеска министерствата за животна средина и просторно планирање и за земјоделство, шумарство и водостопанство.
Оттаму бараат граѓаните да се однесуваат одговорно на отворено со цел да се даде максимален национален придонес кон намалување на заканите од пожари кои во периодот беснееат на целата територија на државата.
Според податоците од ЈП Национални шуми, годинава е опожарена вкупна површина од над 14 000 хектари.
Со оглед дека пожарите имаат сериозни негативни последици не само за шумскиот фонд, туку влијаат и на квалитетот на воздухот, на животот и здравјето на луѓето, на биодиверзитетот и на целокупните климатски промени од министерствата напоменуваат дека сите сторители ќе бидат казнети согласно со пропишаните законски одредби кои предвидуваат соодветни казни за физички и правни лица.
