Најмалку 10 лица ќе одговараат за криминалот од над 4,5 милиони евра во ФФМ

Од:

Се стега обрачот околу поранешното и сегашното раководство на ФФМ по многубројните пријави за криминал и проневерени пари наменети за македонскиот фудбал. Заедно со сметководителката за којашто „А1он“  објави дека со допишување нули на фактурите проневерила над еден милион евра, одговорност ќе се бара од најмалку 10 лица. Сомневањата се дека биле проневерени најмалку 4,5 милиони евра.

„Завршуваме со проверките за случајот со криминал во Фудбалската федерација на Македонија. Се прават завршни координации меѓу институциите кои работат на случајот. Точната бројка на лица кои ќе одговараат за направениот криминал сè уште не можеме да ја откриеме, но најмалку 10 лица се во прашање“, велат  истражителите за „А1он“.

Последниве неколку недели Управата за финансиска полиција правеше тројна контрола во Фудбалската федерација. Три тима од Управата истовремено правеа проверки на сметководството, ги проверуваа фирмите со кои соработувала Федерацијата поради сомневањата дека тоа бил еден од начините на кои се одлевале парите, а детални теренски проверки се правеа и по стадионите и објектите каде што последниве години Федерацијата инвестирала.

Лани во октомври, поради сомневања за проневери, Фудбалската федерација поднела кривична пријава против главната сметководителка и против непознати лица, но молчеле за кривичната до минатиот месец, кога на барање на „А1он“ известија за сомневањата.

Главната сметководителка Олгица Малденоска, како што велат вработени во Федерација, со години водела луксузен живот на сметка на македонскиот фудбал. На работа доаѓала со чевли од 1.000 евра, со скапи чанти, трипати годишно одела на одмор, односно си дозволувала работи кои вработените велат дека се невозможни со платите од Федерацијата. За да си го дозволи луксузот, вработените се жалат дека водела двоно книговодство, го делела ќарот со фирмите кои ги ангажирала Федерацијата, а истражителите утврдиле и дека допишувала нули на фактурите.

Поранешниот член на Управниот одбор на Федерацијата Љубомир Ѓурчески за „А1он“ објасни дека за да може да допишува нули, да води двојно книговодство и да проневерува пари, сметководителката била ујдисана и имала поддршка од раководството, а проневерените пари тој смета дека се повеќе од 4,5 милиони евра. Поради сомневањата за криминал во Федерацијата, Ѓурчески вели дека во последните три години против поранешното и сегашното раководство се поднесени девет кривични пријави од кои две се од него, а дел од пријавите се од институциите. Во 2019 година против поранешното и сегашното раководство на Федерацијата две кривични пријави поднесе и Агенцијата за млади и спорт.

Од Обвинителството за „А1он“ изјавија дека имаат оформено предмет за криминалот во ФФМ и дека надлежниот обвинител постапува по пријавите.

Би можело да ве интересира

ОЈО: Отфрлена кривична пријава за повреда на авторско право и пиратерија

Ана Ололовска

Кривична пријава за поранешниот градоначалник на Зелениково и уште шест лица за злоупотреба на службената положба

Ана Ололовска

Албански државјанин обвинет за фалсификување на пасош

Ана Ололовска

Обвинение за татко и син – дилери на кокаин

Катерина Павлова-Николовска

Ќе се вештачат проневерите од 2,4 милиони евра во ФФМ

Маја Илиевска-Пачемска

ВИДЕО: Македонската фудбалска репрезентација на домашен терен ја совлада Естонија

А1он