Основното јавно обвинителство Охрид поднесе обвинение против едно лице за три кривични дела – телесна повреда, противправно лишување од слобода и загрозување на сигурноста, информираа од Обвинителството.
Според наводите во обвинението, осомничениот при вршење семејно насилство противправно ја затворил, физички ја нападнал и телесно ја повредил оштетената, притоа загрозувајќи ја и нејзината сигурност.
Од ОЈО Охрид соопштуваат дека јавниот обвинител презел повеќе истражни дејствија за целосно расчистување на настанот. Била испитана оштетената во присуство на претставници на социјалните служби, а било наредено и извршено вештачење за утврдување на видот и карактерот на повредите.
Заедно со обвинението, обвинителството до Основниот суд во Охрид доставило и предлог за определување мерка притвор за обвинетиот, имајќи ги предвид околностите утврдени во текот на постапката.
Од Обвинителството посочуваат дека обвинетиот бил обезбедуван во текот на целата постапка.
Според претходните информации, станува збор за случајот со 26-годишната Сара Ѓорѓиевска од Охрид, за чиј напад беше осомничен 31-годишниот Кристијан Корабовски.
