Според прегледот на засеани, ожнеани површини и остварено производство по земјоделски култури за 2017 година, жетвата во кривопаланечкиот регион и подрачјето на општина Ранковце е завршена.
Од Подрачната единица на Министерството за земјоделство, шумарство и водостопанство – Крива Паланка, информираат дека најзастапена житна култура е јачменот, кој бил засеан на 1060 хектари површина, а со 100 проценти ожнеаност е добиен просечен принос од 2.600 килограми по хектар.
Најголеми приноси, пак, се остварени кај хибридната житарка, тритикале, која се користи како добиточна храна. Од засеани и ожнеани 60 хектари површина добиени се просечно три тони по хектар. Р’ж бил засеан на 130 хектари, а просечните приноси по хектар изнесуваат 2.800 килограми. Од ПЕ на МЗШВ потенцираат дека целосно е ожнеана и површината засеана со пченица, 860 хектари, а просечните приноси се 2.100 килограми по хектар, додека 1.500 килограми е просечниoт принос по хектар остварен од овес кој бил засеан нa само 60 хектари.
Со жетвата на подрачјето на Крива Паланка и Ранковце е опфатена вкупна површина од 2.170 хектари, од кои, со пролетната и есенска сеидба, најголем дел – 1.800 хектари се засеани од страна нa индивидуални земјоделски производители, додека 370 хектари се од земјоделските претпријатија од двете општини.