Во организација на Општинскиот комитет на ВМРО-ДПМНЕ во Охрид денеска се одржа панел-дискусија посветена на начините за унапредување и развој на туризмот како една од најважните стопански дејности во градот.
Пратеникот на ВМРО-ДПМНЕ во Собранието на РМ од Охрид Хари Шокаровски истакна дека преку преземените владини активности и мерки, забележливи се значајни резултати на полето на туризмот.
– Сведоци сме на зголемувањето на бројот странски туристи во Охрид, реализирано преку субвенционирањето на тур-операторите, како и со низа мерки за поддршка на нискобуџетните авиокомпании, што придонесува на зголемување на протокот на гости во Охрид и Макеоднија, рече тој.
Негова оценка е дека ваквите панел-дускусии се од корист на граѓаните на Охрид, за запознавање на целата јавност за мерките што се носат за помагање на субјектите што оствауваат приход од туризмот.
– Тоа се кредитните линии со ниски каматни стапки, наменети за помагање на малите и средните туристички бизниси, за хотели и сместувачки капацитети со до 70 легла, како и низа потенцијални финансиски мерки наменети за сите граѓани што планираат да се занимаваат со оваа исклучително важна стопанска дејност, додаде Шокаровски.
Кандидатот за градоначалник на Охрид на ВМРО-ДПМНЕ Никола Бакрачески рече дека интенција на идната локална самоуправа е во нејзиното функцинирање да биде промовирана експерската јавност и тоа во сите области така и во туризмот.
– Наша цел е да промовираме европски вредности во работата на локалната самоуправа. Во делот на развојот на туризмот тоа ќе се оствари преку подобра комуникација, соработка и координација на сите субјекти вклучени во развојот на туризмот во Охрид. Преку такви активности ќе бидат изнајдени најдобри можни решенија за развојот на туризмот, не само на Охрид туку и пошироко, подобар туристички прозивод.
Бакрачески забележа дека без вклучување на експертска јавност и бизнис-заедницата од областа на туристичките дејности не може да се очекуваат добри резултати при креирањето развојна туристичка стратегија.
– Мислењата на експертите се мошне важни во процесот на изнаоѓање најдобри можни решенија, и тоа не само во туризмот туку и во сите области од поширок општествен интерес. Она што ни останува нас е преку вакви трилатерални средби да овозможиме креирање најдобри развојни решенија, тоа ќе биде основа на функционирањето на идната локална самоуправа, рече тој.