Жичница долга околу 3,5 километри ќе се гради на врвот од планината Јабланица за што деновиве ќе биде распишана и тендерската постапка.
Според градоначалникот на Вевчани, Цветомир Угриноски, скијачкиот терен ќе се изгради на месноста викана Голина, а проектот ќе биде изграден најверојатно со јавно-приватно партнерство.
– Документацијата е подготвена и деновиве ќе се распише тендер за изведувач. Најверојатно ќе биде странски изведувач и мислам дека се заинтересирани Австријци. Сето тоа ќе чини околу 250 илјади евра, појасни Угриноски.
Пред десетина дена, додаде тој, претставници на МЕПСО биле на терен и констатирале дека на ова место има одлични услови за развој на зимскиот туризам. Експерти од Хирдрометеоролошкиот завод вршеле испитувања и поставиле мерни станици за да утврдат колку време се задржува снегот на врвот од Јабланица, каде што ќе се гради зимскиот центар.
– Поволност е што снегот на планината се задржува седум месеци. Паѓа во ноември, а се топи во мај и го има во големо количество. Кога ќе се изгради жичницата Охридското Езеро ќе се гледа како на дланка. Природата е многу убава, планината е питома, а до скијачките возила ќе може да се оди со автомобил, рече Угриноски.
Откако ќе почне реализацијата на проектот предвидено е да биде готов за 12 месеци.