Шест вински сомелијери, претставници на најрелевантниот вински магазин „Декантер“ за Централна и Југоисточна Европа, ги посетија македонските винарници.
Ангела Мур, позната како Master of Wine, Стефан Брук, Стивен Спуриер, Џулија Хардинг, Каролин Гилби и Џејмс Буд ги посетуваа македонските винарии и ги дегустираа нивните вина. За секое од дегустираните вина, престижните вински критичари и сомелијери ќе подготват осврт што се користи од дистрибутерите и сопствениците на ресторани во набавката на вина од конкретен вински регион.
Првата ваква посета, организирана од Асоцијацијата „Вина од Македонија“, а финансиски овозможена од страна на сите винарии кои беа посетени, се очекува да овозможи промоција и популарност, а со тоа и подобар пласман на македонските вина на странските пазари.
Завршната дегустаторска вечер се одржа во Винарија Стоби.
– Посетата на сомелијерите на Декантер е од исклучително значење за промоција на македонските вина. Пред се тоа е уважување на македонскиот вински регион и истакнување на потенцијалите што ги имаат нашите вина. Од критиките што ќе ги дадат за нашите вина во голема мера зависи влезот на извесен пазар и третманот што виното го добива од рестораните, хотелите, па дури и крајниот потрошувач затоа што вистинските уживатели на вино ги следат објавите на Декантер, изјави Дане Јованов, директор од Винарија Стоби.
Винскиот магазин, Декантер е најрелевантен медиум со неспорно влијание врз креирање на мислењето за квалитетот, карактеристиките на винските региони, како и вината што ги продуцираат. Седиштето на Декантер е во Лондон, со што влијанието на овој магазин е огромно посебно на овој пазар, кој е еден од најпрестижните. Воедно е организатор на едно од најзначајните натпреварувања и оценувања на вино во светот.