Бројот на невработени во Босна и Херцеговина се зголемил за речиси 11.000 лица за една година, објави сараевскиот весник „Дневни аваз“, повикувајќи се на официјални податоци на Управата за економско планирање на БиХ.
Вкупниот број на невработените во земјата во мај изнесувал 547.300 лица, што е за два проценти повеќе, отколку во истиот период минатата година.
Според податоци на Управата, невработеноста во БиХ е 44,5 отсто и е највисока во Европа. Најмногу се намалил бројот на невработени во приватниот сектор, особено во градежништвото, рударството и преработувачката индустрија.