Потпретседателот на Федерацијата на Босна и Херцеговина, Игор Стојановиќ денеска објави дека поднел кривична пријава против претседателот на Република Српска, Милорад Додик, до Обвинителството на Босна и Херцеговина, поради сомнение дека сторил кривично дело поттикнување национална, расна и верска омраза.
Во објавата на Фејсбук, Стојановиќ изјави дека Додик во јавни настапи давал изјави кои го навредуваат достоинството на Бошњаците и ги „кршат правата на религијата, културата и слободното уживање на сите основни слободи загарантирани со устав и меѓународни акти“.
Стојановиќ изјави дека „имам институционална и морална обврска да реагирам кога се загрозени темелите на државата – еднаквоста, безбедноста и достоинството на нејзините граѓани“.
„Молкот пред говорот на омраза не е опција. Босна и Херцеговина е држава на сите нејзини народи и граѓани. Нејзините темели се во борбата против фашизмот, во слободата и еднаквоста. Патриотизам значи одбрана на достоинството на секој човек и заштита на вредностите на кои почива оваа земја“, посочи тој.
Во обраќањето пред новинарите на 29 април, по состанокот на владејачката коалиција во тој ентитет, Додик изјави дека решението за БиХ е Бошњаците „да се вратат на верата на своите предци, така што Босна и Херцеговина ќе биде мнозинско српско“.