Игор Додик, синот на лидерот на Сојузот на независни социјалдемократи (СНСД), Милорад Додик, е предложен за нов претседател на Владата на Република Српска, еден од двата ентитета во Босна и Херцеговина.
Одлуката денеска во Бања Лука ја соопшти претседателот на Република Српска, Саво Миниќ, по консултациите со претставниците на партиите од владејачката коалиција. Игор Додик моментално е организациски секретар на СНСД.
Igor Dodik novi premijer bh. entiteta RS👇 https://t.co/Z6Ghzwr43z
— Vijesti.ba (@Vijesti_ba) November 22, 2026
По консултациите со претставниците на владејачките партии, Миниќ на прес-конференција го објави името на новиот мандатар.
Игор Додик сега треба да состави нова ентитетска влада и да ги предложи министрите. За да ја преземе премиерската функција, составот на владата треба да добие поддршка од Народното собрание на Република Српска.
„Мандатот го прифаќам со целосна одговорност“, рече Додик, заблагодарувајќи му се на Саво Миниќ за укажаната доверба, како и на СНСД, кој го предложи за мандатар.
Тој нагласи дека довербата ќе мора да ја оправдува секојдневно со својата работа, одлуките и резултатите во интерес на граѓаните на Република Српска.
Посебно внимание посвети на односите со Србија, изразувајќи надеж дека ќе соработува со новата влада во Белград, која, според неговите зборови, ќе ја предводи Студентската листа.
„Соработката со братска Србија ќе има посебно место во работата на новата влада. Особено ми е важно со идната влада на Србија да воспоставиме блиска и ефикасна соработка, да продолжиме со заедничките проекти и да започнеме нови“, рече Додик.
Осврнувајќи се на Европската Унија, тој порача дека поддршката за членство зависи од односот кон Република Српска.
„Ние сме за ЕУ само онолку колку што ќе бидеме почитувани“, изјави Додик.
Тој рече и дека Република Српска мора да се менува, а граѓаните покрај тоа што очекуваат институциите да работат за нив, треба да се прашаат и што самите можат да направат за својата заедница.
„Сите размислуваат како да го променат светот, а никој не размислува како да се промени себеси. Свесен сум дека мораме да се менуваме“, рече Додик.
Според него, Република Српска достигнала фаза на развој во која секој поединец треба да преземе одговорност за придонесот кон општеството, својот град и заедницата.
Како приоритети на идната влада ги посочи платите од кои граѓаните ќе можат достоинствено да живеат, стабилните пензии со можност за раст, поквалитетната здравствена заштита и образование, како и обезбедувањето иднина за младите.
„На тоа идната влада ќе работи од првиот ден“, најави тој.
Додик порача дека владата ќе мора да носи и тешки одлуки, дури и кога тие ќе бидат болни.
„Тајната на среќата е во слободата, а тајната на слободата е во храброста. Можам да ветам дека ќе бидеме храбри и дека ќе носиме одлуки, дури и ако се болни“, рече тој.
На крајот истакна дека не го интересираат заслугите, туку резултатите, и дека е подготвен да разговара со секој што ќе понуди јасен план и идеја. Додаде дека политичкото несогласување не го смета за причина некого да го доживува како непријател.
Народното собрание на Република Српска беше конституирано на 16 ноември, по општите избори во Босна и Херцеговина одржани на 4 октомври. За претседател на парламентот повторно беше избран Ненад Стевандиќ.
СНСД на Милорад Додик освои најмногу гласови во Република Српска. Со предлагањето на Игор Додик за мандатар, партијата продолжува со формирањето на новата ентитетска власт.
