Рекреативните и спортските риболовци од Охрид одржаа работна средба со кандидатот за градоначалник на Охрид д-р Никола Бакрачески, на која го запознаа со проблемите со кои тие се соочуваат и ги слушнаа неговите видувања околу можните решенија, насочени кон омасовување на рекреативниот риболов, постигање врвни резултати на спортски план, заштита на рибниот фонд и развивање на рибниот туризам, како дел од алтернативниот туризам.
– Охридското Езеро како голем хидропотенцијал заедно со сливот е идеален за развој на рибарството и има посебно место во програмата на д-р Бакрачевски, кој нагласи дека неговите корени потекнуваат од рибарска фамилија и дека со поголем дел од проблемите во рибарството е запознаен. Ќе помогне и со иницијативи кои се под надлежност на локалната самоуправа, а за оние за кои е надлежна централната власт ќе се заложи за посредување за да се надминат сите проблеми и нејаснотии од областа на рибарството. При тоа, тој понуди и некои директни решенија, кои со заедничка соработка и подобра комуникација ќе значат решавање на проблемите, велат од Здружението нa спорстки риболовци „Св. Апостол Петар“.
Како рекреативни и спортски риболовци од Охрид, тие се задоволни што прв пат рибарството е составен дел од изборната програма на еден кандидат за градоначалник, за која се подготвени да ја поддржат.
– Риболовот и рибарските манифестации во иднина може уште повеќе да напредуват и да станат охридски бренд и директно да придонесат за развој на туризмот, а Охрид постепено од локална да прерасне во балканска и европска позната риболовна дестинација, сметаат од Здружението.